The Penitence of Adam and Eve

« Cy commence ung petit traittié intitulé la Penitance Adam, translaté de latin en françois par Colart Mansion, au commandement de noble et puissant seigneur monseigneur de la G[ruthuse], conte de Wincestre, prince de Steenhuse, etc. »
Source: gallica.bnf.fr
Bibliothèque de l’Arsenal, Ms-5092 réserve, fol. 5v.

This lesser known episode in the life of Adam and Eve merits closer examination. Here is a semi-diplomatic transcription of a portion of this manuscript, followed by my translation.

« Cy commence ung petit traittié intitulé la Penitance Adam, translaté de latin en françois par Colart Mansion, au commandement de noble et puissant seigneur monseigneur de la G[ruthuse], conte de Wincestre, prince de Steenhuse, etc. »
Source: gallica.bnf.fr

La Penitance Adam

(Extrait)

Fol. 10v.
Comment Adam et Eve mis et constituez ou monde bas commencerent a querir leur vie et de leurs complaintes et miseres quilz eurent. VIe Chapitre.

Apres ce que Adam et Eve furent expulsez et bannis de paradis terrestre et de delices par la prevarication et transgression du commandement de dieu en mengant du fruit de science et de vie a eulz deffendu sicomme dit est ils firent et composerent au mieulz quilz peurent eulz venus en terre ung petit tabernacle ou ilz plourerent doloureusement et lamenterent par lespace de sept jours continuelz regardans lung laultre en tresgrant tristresse et angoisse. Aprez lequel terme ilz commencerent [11r] avoir moult grant faim et queroient partout environ eulz aulcune chose dont ilz peussent mengier et assouvir leur faim mais riens ne trouverent pour quoy Eve en plourant dist a Adam:

O mon seigneur et mon bon mary, certes maintenant congnoy-je la cause de mon pechie et le courroux de mon createur par la grant faim que je porte et seuffre. Va, je te prye et sy nous quieres aulcune chose adfin que nous mengons et vivons paraventure nous regardera nostre Seigneur des yeulz de sa misericorde et nous rappellera au lieu ouquel nous soulions habiter et dont nous sommes expulsez et a bon droit.

Adam, a la parole de Eve sa compaigne, se leva du lieu triste ou il sestoit mis pour plourer et deambula par sept jours toute la terre denviron eulz mais il ny trouva point de tele viande comme avoir souloit ou jardin de delices [11v] dont nagaires il souloit estre roy et seigneur. Pour quoy luy retourne. Eve luy dist:

O mon treshonoure seigneur, a la mienne voulente que je fusse morte paraventure derechief te remettroit dieu en paradis ton royaulme car pour moy at par ma coulpe est dieu courrouce contre toy. Se tu veulz, occis-moy je ten prye comme celle quy bien lay desservy car je suy la cause de nostre pechie et par consequent de nostre ruyne et non pas toy.

A laquelle respondy Adam: Apaise-toy, Eve, et ne veulles penser ne dire telles paroles a celle fin que paraventure nostre Seigneur ne soit derechief courrouce contre nous et envoye sa malediction sur nous. Et aussy comment se pourroit ce faire que je meisse ma main violente en toy quy es ma propre char? Mais laissons ces parolles et querons notre vivre adfin que ne perissons [12r] et defaillons par nostre paresce.

A ces paroles se leverent et eulz deux ensamble quisrent par ix jours leur vivre mais riens ne trouverent comme ilz souloyent avoir ou lieu de leur premiere creation. Ains tant seulement trouverent viande pareille a celle que les bestes mengoient. Dont eulz moult doloureux et angoisseux lung regardant laultre Adam dist a Eve:

Nostre Seigneur donne aux animaulz et bestes brutes viande a mengier adfin quilz vivent et nagaires nous estoit administree viande angelicque mais justement et dignement nous complaignons devant le regarde de nostre Seigneur quy nous a fait et nous repentons en faisant grande penitance et en ce faisant paraventure aura dieu de nous mercy et nous disposera la chose dont nous viverons.

Lors dist Eve a Adam: Monseigneur et mary, dis-moy [12v] je te prye quele chose est penitance et comment nous la ferons adfin que paraventure ne commencons tel labour que ne le puissons accomplir et que noz pryeres ne fussent exaulcees et par ainsy que nostre seigneur dieu ne destourne sa face de nous car desja ne luy avons pas tenu ne accomply ce que luy avions promis. Et toy, mon chier amy et seigneur pour quoy as tu pense de faire penitance quand je meismes suy celle quy tay induit et amene a ceste doloureuse tribulation?

Ma compaigne, respondy lors Adam, force est que pour apaisier nostre Seigneur nous faisons penitance mais tu ne la peus soustenir par tant de temps comme moy. Or fay doncques ainsy comme je tenseigneray et tu seras saulvee. Je doy faire quarante jours de jeune. Et toy, lieve sus et ten va au fleuve du Tigre et por[13r]te avecques toy une pierre que tu mettras dedens le canal ou fil de lyaue sur laquelle seras en estant jusques au col et ne isse de ta bouche parolle aulcune par lespace de xxxiii jours. Car nous ne sommes pas dignes de ouvrir noz bouches pour deprier nostre Seigneur pour ce que noz levres furent faittes immondes et souillies par latouchement du fruit a nous deffendu. Soyes donques, Eve, ma compaigne par lespace de xxxjjj jours en lyaue du fleuve du Tigre en la maniere comme je le tay devise. Et je men iray au fleuve Jordain ou je seray pareillement par lespace de xl jours et par ceste maniere paraventure ara dieu mercy de nous.

Comment Adam et Eve se departirent lung de laultre pour aler faire leur penitance. VIIe Chapitre.

Quand Adam eubt finee sa raison [13v] Eve prist de luy congie et en grant amertume de cueur sen ala tout droit au fleuve du Tigre ou elle porta une pierre et fist selon le conseil et instruction que son mary luy avoit donne. Semblablement sen ala Adam au fleuve de Jordain prist une pierre et la mist ou mylieu dudit fleuve puis se mist en piez dessus icelle en lyaue jusques au col. Puis dist Adam au fleuve O toy, eaue Jordain, Je te prye que tu veulles condoloir a ma misere et non pas toy seulement mais toutes les choses nagans en vivans en toy me environnent et pleurent avec moy non pas pour chose quelles ayent desservy ne pour leur pechie mais pour le mien quy ay transgresse le commandement de mon createur. Et tantost a ceste pryere tous les poissons et aultres choses nagans environnerent Adam et meismes lyaue demoura immobile [14r] et sans cours depuis celle heure jusques a la fin de sa penitance.

Comment Eve par la suggestion du dyable rompy sa penitence. VIIIe Chapitre.

Ainsy trespasserent xxviii jours pour quoy Sathan moult envieux de cestuy benefice se transfigura en samblance d’angele en laquele forme il sen ala au fleuve de Tigris devers Eve quil trouva en lyaue jusques au col moult fort plourant. Le dyable la voyant en cest estat commenca a faire maniere de plourer comme sil eust compassion de sa grande et austere penitance et luy dist en ceste maniere: O Eve, je te prye wide de ce fleuve et sy te repose ung pou de ta grande tristesse et de ton gemissement dont tu es sy sollicite. Et Adam ton mary pareillement est solliciteux. Nostre Seigneur a oy vostre gemissant pryere et sy a receu en gre vostre austere [14v] penitance et nous angeles avons deprie dieu et aoure pour vous. Et de fait ma envoye vers vous adfin de vous mettre hors de leaue. Et adfin aussy de vous preparer aliment et nourreture pareille a celle que vous eustes en paradis et pour quoy vous vous estes plains a dieu aultre foiz. Is hors, Eve, de ceste yaue et je te menray au lieu ou jay appareille vostre vie pour ton mary et pour toy.

Eve oyant ceste persuasion creut de legier aux consolatives paroles du temptateur, sy issy de lyaue du fleuve et sa char estoit faicte comme ung raim dherbe croissant en froide yeaue. Et quand Eve fut hors de leaue du fleuve elle de foiblesse cheut a terre. Le dyable la releve tantost et de son gre la mena a Adam son mary. […]

Notice the feet of the “angel” helping Eve out of the water:

« Cy commence ung petit traittié intitulé la Penitance Adam, translaté de latin en françois par Colart Mansion, au commandement de noble et puissant seigneur monseigneur de la G[ruthuse], conte de Wincestre, prince de Steenhuse, etc. »
Source: gallica.bnf.fr